पुणे : रेसिडेन्सी क्लबला नुकतीच २६ वर्ष पूर्ण झाली असून, संस्थेचा 'पुणे प्राइड अॅवॉर्डस्' हा दिमाखदार सोहळा नऊ डिसेंबर रोजी पार पडला. हा सोहळा 'रेसिडेन्सी क्लब ब्रह्माकॉप'चे अध्यक्ष आर. के. अग्रवाल यांच्या मार्गदर्शनाखाली आयोजित करण्यात आला होता. या वेळी विविध क्षेत्रात उल्लेखनीय योगदान देणाऱ्या आणि पुणे शहरासाठी अभिमानस्पद अशा व्यक्तींचा सन्मान करण्यात आला आणि त्यांना पुणे प्राइड अॅवॉर्डने गौरविण्यात आले.
मान्यवरांच्या हस्ते दीपप्रज्वलन करून या कार्यक्रमाची सुरुवात झाली. मुख्य अतिथी डॉ. बाबा कल्याणी यांचा परिचय पद्मश्री लीला पूनावाला यांनी करून दिला. त्यानंतर आर. के. अग्रवाल यांनी डॉ. बाबा कल्याणी आणि डॉ. अजय चंदनवाले यांना स्मृतिचिन्ह देऊन त्यांचा सत्कार केला. अग्रवाल यांनी मान्यवरांचे स्वागत केले.
कार्यक्रमाचे मुख्य अतिथी डॉ. बाबा कल्याणी यांच्या हस्ते श्रीमती सुमित्रा भावे यांना 'जीवन गौरव पुरस्कार' देऊन गौरविण्यात आले. कॉर्पोरेट क्षेत्रातील कामगिरीसाठी हनमंत गायकवाड, समाज कार्यासाठी डॉ. विनोद शहा, कला आणि संस्कृती क्षेत्रासाठी उस्मान खान, शैक्षणिक क्षेत्रासाठी प्रा. एम. एस. वाडिया व क्रीडा क्षेत्रासाठी गौरी गाडगीळ यांनाही कार्यक्रमात पुरस्कार देण्यात आला.
देशाच्या सुरक्षिततेसाठी शहीद झालेल्या शूर सैनिकांच्या पत्नींना या कार्यक्रमात कर्नल संभाजी पाटील यांच्या हस्ते शिलाई मशीन देऊन गौरविण्यात आले.
डॉ. एस. बी. मुजुमदार, विठ्ठल मनियार, डॉ. के. एच. संचेती, लीला पूनावाला, संभाजी पाटील, सबिना संघवी, व्ही. एम. मस्के, सुभाष सणस, डॉ. मोहन आगाशे, चंद्रकांत बोर्डे यांनी पुरस्कारासाठीच्या सल्लागार मंडळाचे सदस्य म्हणून काम पाहिले.
